_-YEG-_
اسمع/ي هالكلام وخليه يمك، لأن هو مو بس نصيحه... هذا شي ممكن يفيدك طول عمرك
شوف، بالحياة راح تمر بناس هواي، ناس تحبك، وناس تتصنع، وناس تستفاد منك، وناس بس تريد وجودك حتى تحس نفسها مو وحدها... فلا تعطي كل قلبك بسهولة، ولا تثق بكل واحد يضحك بوجهك. مو كل ضحكة صافية، ومو كل كلمة حلوة صادقة. مرات أقرب الناس إلك ممكن يوجعوك بدون ما يحسون، ومرات الغريب يكون أحن عليك منهم. فخلي عندك ميزان، لا تصير طيب زيادة عن اللزوم ولا تصير قاسي وتغلق قلبك... خلك بالنص، تعرف شلون تحب بدون ما تضيع نفسك.
وتذكر، مو كل خسارة هي خسارة، مرات رب العالمين يبعد عنك ناس لأنهم مو خير إلك، حتى لو إنت تحبهم وتموت عليهم. لا تركض ورا اللي يتركك، ولا تتوسل للي ما يقدّر قيمتك. إذا واحد قدر يعيش بدونك، إنت هم تگدر تعيش بدونه، ويمكن أحسن بعد. الكرامة قبل كلشي، لأن إذا راحت الكرامة، ما يبقى شي تستند عليه.
وبالنسبة للحياة بشكل عام... لا تقارن نفسك بغيرك، كل واحد عنده وقته وظروفه وطريقه. يمكن غيرك وصل وانت بعدك بالبداية، بس هذا مو معناته انت متأخر، هذا بس يعني طريقك مختلف. امشي بطريقك حتى لو كان بطيء، أهم شي ما توقف. الوقوف هو الخسارة الحقيقية، مو التأخير.
وإذا يوم حسّيت نفسك تعبان، مخنوك، أو كلشي متراكم عليك... لا تكتم، احچي، حتى لو ويا نفسك. البچي مو ضعف، التعب مو عيب، والإنسان مو لازم يكون قوي طول الوقت. ترى حتى أقوى الناس تمر بلحظات تنهار بيها، بس الفرق إنهم يرجعون يوقفون مره ثانية.
وخلي عندك مبدأ: لا تندم على شي سويته من قلبك. إذا نيتك كانت صافية، فحتى لو النتيجة كانت مؤذية، إنت ما غلطت... الغلط من اللي ما قدّر. لا تغيّر طيبتك لأن غيرك كان سيء، لأن الطيب بالنهاية يربح، حتى لو تعب بالبداية.
وأهم شي... حب نفسك. مو حب غرور، لا... حب اللي يخليك تحترم روحك، تدلل نفسك، وتوقف بوجه أي شي يكسرك. لا تخلي أحد يقلل منك، ولا تسمح لكلام الناس يحدد قيمتك. إنت تعرف نفسك أكثر منهم، وإنت أدرى شكد تستاهل.
وبالنهاية أگلك هالكلمة: الدنيا مو دايمة على حال، يوم إلك ويوم عليك. لا تفرح زيادة عن اللزوم حتى ما تنصدم، ولا تحزن لدرجة تنسى تعيش. خلك متوازن، وخلّي قلبك قوي وعقلك واعي... وصدقني، راح تعدي كلشي مهما كان صعب.
